ក្រុមហ៊ុនសហគ្រាសប៉េប៉េអឹម-ខនហ្វីរេលប្រារព្វពិធីបុណ្យចូលឆ្នាំខ្មែរ

ដោយគោរពតាមប្រពៃណីខ្មែរ ដើម្បីជាកិច្ចចាប់ផ្តើមទទួលទេវតាឆ្នាំថ្មី ក្រុមការងារទាំងអស់របស់ក្រុមហ៊ុន-សហគ្រាស ប៉េប៉េអឹម-ខនហ្វីរេលបាននិមន្តព្រះសង្ឃសូត្រមន្តប្រោះព្រំឲ្យពរជ័យ កាលពីថ្ងៃទី១២ មេសា ពោលគឺមួយថ្ងៃមុនថ្ងៃឈប់សម្រាកចូលឆ្នាំខ្មែរ។ ក្រោយពីព្រះសង្ឃសូត្រមន្តឲ្យពរជ័យរួចហើយ លោកឧកញ៉ាឱសថបណ្ឌិត​ហៃ លីអ៊ាង ប្រធានអគ្គនាយកក្រុមហ៊ុនសហគ្រាស បានថ្លែងអំណរគុណដល់សហការីទាំងអស់ចំពោះកិច្ចខិតខំប្រឹងប្រែងរបស់ពួកគេកន្លងមក ដែលនាំឲ្យក្រុមហ៊ុនសហគ្រាសទទួលបានជោគជ័យជាច្រើន។

លោកឧកញ៉ាឱសថបណ្ឌិតមានប្រសាសន៍គូសបញ្ជាក់យ៉ាងដូច្នេះ៖ «បញ្ហាប្រឈមមានច្រើនណាស់នៅចំពោះមុខ ជាពិសេសគឺការប្រឈមនឹងការរីកចម្រើនផ្នែកបញ្ញាសិប្បនិម្មិត ​(AI) ហើយមានតែយើងទាំងអស់គ្នារួមគ្នាធ្វើការទេទើបអាចទទួលបានជោគជ័យ»។ បន្ទាប់ពីចែកទានដល់ក្រុមគ្រួសារបុគ្គលិកដែលមានជីវភាពទន់ខ្សោយជាងគេរួចមក កម្មវិធីប្រឡងចម្រៀង និងល្ខោននិយាយដែលចូលរួមដោយក្រុមបុគ្គលិកមកពីផ្នែកផ្សេងៗញ៉ាំងឲ្យបរិយាកាសកាន់តែសប្បាយរីករាយថែមទៀត។ ក្រុមមកពីនាយកដ្ឋានផលិតនៃសហគ្រាសផលិតឱសថប៉េប៉េអឹមទទួលបានជ័យលាភីលេខមួយទាំងបីវិញ្ញាសារតែម្តង៕