ការច្នៃប្រឌិតដើម្បីពង្រឹងសមត្ថភាពប្រកួតប្រជែង

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ សហការជាមួយវេបសាយ FTRIP (វេបសាយស្តីពីបច្ចេកវិទ្យាចំណីអាហារ ការស្រាវជ្រាវ និងការច្នៃប្រឌិត) បានបើកបង្ហាញពីយុទ្ធសាស្រ្តនៃការគ្រប់គ្រងរបស់កម្មវិធី Cambodia Enterprise Innovation Index​ ដែលជាឧបករណ៍យុទ្ធសាស្រ្តសម្រាប់វាស់ស្ទង់ និងកែលម្អសមត្ថភាពច្នៃប្រឌិតរបស់សហគ្រាស ដើម្បីឈានទៅពង្រឹងសមត្ថភាពប្រកួតប្រជែង និងកំណើនប្រកបដោយនិរន្តរភាព។

ក្នុងឱកាសបើកឱ្យប្រើប្រាស់សន្ទស្សន៍នេះកាលពីថ្ងៃទី៣ មីនា ឯកឧត្តមហែម វណ្ណឌី​ រដ្ឋមន្រ្តីក្រសួងឧស្សាហកម្ម សង្កត់ធ្ងន់ទៅលើចំណុច «ការផ្តោតលើការច្នៃប្រឌិត គឺដើម្បីពង្រឹងកេរ្តិ៍ឈ្មោះរបស់ប្រទេសកម្ពុជានៅលើឆាកអន្តរជាតិ និងដើម្បីឱ្យកម្ពុជាឈរក្នុងលំដាប់លេខរៀងល្អប្រសើរនៃសន្ទស្សន៍សកលផ្នែកការច្នៃប្រឌិត ហើយក៏មានន័យថា ដើម្បីបង្កើតបរិយាកាសមួយដែលអំណោយផលដល់កំណើនសេដ្ឋកិច្ចដែលផ្តល់អត្ថប្រយោជន៍ដល់មនុស្សគ្រប់រូបនៅក្នុងសង្គម និងដែលមាននិរន្តរភាព»។

វេបសាយរបស់សារព័ត៌មាន Le PetitJournal បានចុះផ្សាយថា ការច្នៃប្រឌិតគឺជាគន្លឹះដ៏សំខាន់សម្រាប់ធ្វើទំនើបភាវូនីយកម្មលើវិស័យឧស្សាហកម្មនៅកម្ពុជា បង្កើនប្រសិទ្ធភាពធនធាន និងជំរុញឱ្យមានការបង្កើតការងារ។ ឯកឧត្តម Igor Driesmans ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា មើលឃើញពីសក្កានុពលរបស់ប្រទេសកម្ពុជាយ៉ាងដូច្នេះ៖ «ជាមួយនឹងប្រជាពលរដ្ឋដែលមានវ័យក្មេង ការប្រើប្រាស់ប្រព័ន្ធឌីជីថលកំពុងរីកចម្រើនខ្លាំង និងលទ្ធភាពទទួលបានបច្ចេកវិទ្យាថ្មីកាន់តែកើនឡើង កម្ពុជាមានអ្វីគ្រប់យ៉ាងដើម្បីក្លាយជាសេដ្ឋកិច្ចមួយដែលកំណើនពឹងផ្អែកលើការច្នៃប្រឌិត»។

កម្មវិធី Cambodia Enterprise Innovation Index ត្រូវបានបង្កើតឡើងក្នុងក្របខណ្ឌគម្រោង CAPFISH-Capture ឧបត្ថម្ភដោយសហភាពអឺរ៉ុប និងដាក់ឱ្យអនុវត្តដោយអង្គការ UNIDO។ អនុម័តកាលពីខែសីហា ឆ្នាំ២០២៤ ដោយក្រុមប្រឹក្សាជាតិ វិទ្យាសាស្រ្ត បច្ចេកវិទ្យា និងនរានុវត្តន៍ កម្មវិធីនេះផ្តល់ឱ្យក្រុមហ៊ុនសហគ្រាសក្នុងនោះមានក្រុមហ៊ុនខនហ្វីរេលផងដែរ នូវក្របខ័ណ្ឌមួយច្បាស់លាស់ដើម្បីវាយតម្លៃ និងពង្រឹងសមត្ថភាពច្នៃប្រឌិតរបស់ខ្លួន។

លោកសុខ ណារិន តំណាងអង្គការ UNIDO ប្រចាំនៅកម្ពុជា​ យល់ឃើញថា សន្ទស្សន៍នេះគឺជាឱកាសដ៏ល្អមួយសម្រាប់កម្ពុជា៖ «ប្រទេសមួយដែលមានសន្ទស្សន៍ល្អផ្នែកច្នៃប្រឌិតក្លាយជាគោលដៅនៃជម្រើសសម្រាប់វិនិយោគិន។ ដោយដាក់បញ្ចូលបច្ចេកវិទ្យាថ្មីៗ ក្រុមហ៊ុនសហគ្រាសអាចទទួលបានផលិតភាព ផលចំណេញ និងជួយជំរុញកំណើនសេដ្ឋកិច្ចក្នុងវិស័យដែលទើបកកើត ឬកំពុងរីកចម្រើន»។

ចាត់ទុកការច្នៃប្រឌិតជាគន្លឹះសំខាន់នៃយុទ្ធសាស្រ្តអភិវឌ្ឍរបស់ខ្លួនចាប់តាំងពីបង្កើតឡើងនៅទស្សវត្សន៍ឆ្នាំ១៩៩០ មកដោយលោកឧកញ៉ាឱសថបណ្ឌិតហៃ លីអ៊ាង ក្រុមហ៊ុនសហគ្រាសប៉េប៉េអឹម-ខនហ្វីរេលសង្ឃឹមថា ការបង្កើតសន្ទស្សន៍នេះមានសារសំខាន់ណាស់​​​សម្រាប់ប្រែក្លាយការច្នៃប្រឌិត និងការអភិវឌ្ឍធនធានមនុស្ស ឱ្យក្លាយជាកត្តាជំរុញឱ្យក្រុមហ៊ុនសហគ្រាសនានានៅកម្ពុជាមានថាមពលខ្លាំងក្លា៕